Spurt og svarað um bílaleigu

Hvernig bóka ég bíl hjá Höldi?

Auðveldast er að bóka bíl hér á vefnum. Þú velur hvar og hvenær þú vilt sækja bílinn og skila honum og sérð þá hvaða bílar eru í boði og hvað leigan kostar.

Þú getur skoðað verð og framboð án þess að skuldbinda þig til að bóka. Þegar bókun er lokið færðu staðfestingarnúmer og yfirlit yfir bókunina, meðal annars dagsetningar, afhendingar- og skilastað, bílaflokk, aukahluti og verð. Staðfestingin er einnig send í tölvupósti.

Ef þú þarft aftur á móti að bóka bíl fyrir fyrirtæki sem er með föst umsamin kjör, ríkisstofnun eða sveitarfélag þá er einfaldast að gera það í gegn um Flýtibókun.

Hvað er innifalið í leiguverðinu og getur annar kostnaður bæst við?

Verðið við bókun miðast við þær upplýsingar sem þú gefur upp og þá aukahluti sem þú velur. Í bókunarstaðfestingunni kemur skýrt fram hvað er innifalið í verðinu.

Í netverðum Hölds eru meðal annars virðisaukaskattur, lögbundin ábyrgðartrygging, slysatrygging ökumanns og farþega, CDW-kaskótrygging og þjófnaðartrygging. Flugvallagjald og einstefnugjald eru einnig innifalin þegar þau eiga við.

Við leiguna getur þó bæst kostnaður sem ekki er hægt að sjá fyrir við bókun, til dæmis vegna eldsneytis, kílómetragjalds, sekta, tjóns eða annarra gjalda sem falla til á leigutímanum. Opinberir skattar og gjöld geta einnig breyst eftir að bókun hefur verið gerð.

Hvaða greiðslumátar eru í boði og þarf ég kreditkort?

Við upphaf leigu þarf leigutaki að framvísa gildu kreditkorti sem tryggingu fyrir kostnaði sem kann að falla til á leigutímanum, til dæmis vegna tjóns eða sekta.

Þú þarft þó ekki endilega að greiða sjálfa leiguna með kreditkortinu. Fyrirtæki sem eru í fyrirtækjaþjónustu hjá Höldi geta jafnframt almennt verið í reikningsviðskiptum.

Get ég bókað og greitt fyrir bíl sem annar ætlar að keyra?

Nei. Aðalökumaður bílsins og korthafi þurfa að vera sami aðilinn. Hægt er að skrá viðbótarökumann á leigusamninginn gegn gjaldi.

Fæ ég nákvæmlega þann bíl sem ég bóka?
Ekki endilega. Þegar þú bókar tryggir bókunin þér ákveðinn bílaflokk, en ekki ákveðna tegund, árgerð eða útfærslu. Bíllinn sem birtist á vefnum er því dæmi um bíl í viðkomandi flokki. Við afhendingu geturðu fengið þann bíl eða annan sambærilegan bíl í sama flokki.

Hvernig vel ég bíl sem hentar mínum þörfum?

Það ræðst fyrst og fremst af því hvernig þú ætlar að nota bílinn. Hafðu í huga fjölda farþega, farangur, lengd ferða og þær aðstæður sem þú býst við að aka við.

Minni fólksbíll getur verið hagkvæmur kostur fyrir hefðbundinn akstur, en stærri bíll eða fjórhjóladrifinn bíll getur hentað betur þegar farþegar og farangur eru fleiri eða aðstæður krefjandi. Í bókunarferlinu sérðu hvaða bílaflokkar eru í boði á þeim stað og tíma sem þú velur.

Get ég bætt við aukahlutum eða öðrum ökumanni?

Já. Við bókun geturðu valið þá aukahluti sem eru í boði með bílnum. Aukahlutir eru háðir framboði og greitt er sérstaklega fyrir þá.

Einnig er hægt að bæta við öðrum ökumanni. Viðbótarökumaður þarf að uppfylla sömu skilyrði um aldur og ökuréttindi og gilda um viðkomandi bílaflokk.

Get ég breytt eða afbókað bókun?

Já, en skilmálar geta verið mismunandi eftir því hvernig bókunin var gerð og hversu langt er í að leigan hefjist.

Fyrirframgreiddum bókunum er aðeins hægt að breyta eða hætta við með því að hafa samband við þjónustuver símleiðis. Afbókunarskilmálar sem gilda um bókunina ráða því hvort kostnaður fellur til vegna afbókunar.

Get ég sótt bíl á einum stað og skilað honum á öðrum?

Já, það er hægt á mörgum leiðum innanlands. Veldu einfaldlega mismunandi afhendingar- og skilastað þegar þú bókar. Bókunarkerfið sýnir hvort einstefnuleiga er í boði á viðkomandi leið og hvað hún kostar.

Ef þú vilt breyta skilastað eftir að leigan er hafin þarftu að hafa samband við Höld áður en bílnum er skilað.

Hvað þarf ég að hafa með mér þegar ég sæki bílinn?

Þú þarft að framvísa gildu ökuskírteini og gildu kreditkorti í nafni leigutaka þegar þú sækir bílinn. Ökumaður þarf jafnframt að uppfylla aldurs- og ökuskírteinisskilyrði viðkomandi bílaflokks.

Hver eru aldurs- og ökuskírteinisskilyrðin fyrir bílaleigu?

Lágmarksaldur leigutaka/ökumanns er 20 ár og þarf viðkomandi að hafa haft ökuskírteini í minnst 1 ár. Lágmarksaldur leigutaka/ökumanns lúxusbílsbíls og stærri jeppa er 23 ár og þarf viðkomandi að hafa haft ökuskírteini í minnst 1 ár. Leigutaki/ökumaður stærri bifreiða sem samkvæmt lögum hverju sinni þarf aukin ökuréttindi til að aka (meirapróf / rútupróf) skal framvísa ökuskírteini sem uppfyllir slík skilyrði við gerð leigusamnings.

Hvað geri ég ef ég er ekki með ökuskírteinið mitt?

Þú þarft að framvísa gildu ökuskírteini til að fá bíl afhentan.

Ef ökuskírteininu hefur verið stolið eða það glatast geta önnur gögn komið til greina við sérstakar aðstæður. Hafðu samband við Höldur áður en þú sækir bílinn til að kanna hvað gildir í þínu tilviki.

Hvað þarf ég að vita um leigusamninginn áður en ég legg af stað?

Leigusamningurinn er samningur milli Hölds og leigutaka þar sem meðal annars koma fram upplýsingar um bílinn, leigutímann, verð og skilmála leigunnar.

Farðu yfir samninginn áður en þú leggur af stað og gakktu úr skugga um að upplýsingar um leigutíma, bíl og valda aukahluti séu réttar.

Hvað ætti ég að skoða á bílnum við afhendingu?

Gott er að skoða bílinn áður en þú leggur af stað og bera ástand hans saman við þær upplýsingar um ástand og skemmdir sem fylgja leigunni. Þannig tryggjum við að þú og við séum sammála um ástand bílsins þegar leigan hefst.

Hvað geri ég ef ég sé skemmd eða rispu á bílnum við afhendingu?
Láttu starfsfólk vita áður en þú leggur af stað ef þú tekur eftir skemmd sem ekki hefur þegar verið skráð. Þá er hægt að skoða bílinn með þér og uppfæra upplýsingarnar um ástand hans ef þörf er á.

Get ég fengið aðstoð við stjórntæki og búnað bílsins?

Já, að sjálfsögðu. Ef þú ert óviss um einhver stjórntæki eða búnað bílsins skaltu endilega biðja starfsfólk okkar um að fara yfir þau með þér áður en þú leggur af stað.

Get ég framlengt leiguna eftir að hún er hafin?

Já, oft er hægt að framlengja leiguna ef bíllinn er laus áfram. Hafðu samband við okkur áður en núverandi leigutíma lýkur til að fá framlenginguna samþykkta.

Við framlengingu bætist við leigukostnaður og mögulega þarf nýja heimild á kreditkort. Mikilvægt er að ganga formlega frá framlengingunni þar sem tryggingar miðast við þann leigutíma sem skráður er í leigusamningnum.

Má annar en skráður ökumaður aka bílnum?

Ef fleiri en einn ætla að aka bílnum þarf að skrá viðbótarökumann á leigusamninginn. Viðbótarökumaður þarf að uppfylla þau skilyrði um aldur og ökuréttindi sem gilda um viðkomandi bílaflokk. Greitt er sérstaklega fyrir viðbótarökumann.

Hvað geri ég ef bíllinn bilar eða viðvörunarljós kviknar

Ef bíllinn bilar eða þú telur að ekki sé öruggt að aka honum skaltu stöðva á öruggum stað og hafa samband við okkur. Aðstoð er í boði allan sólarhringinn og upplýsingar um neyðarnúmer fylgja leigusamningnum.

Ef viðvörunarljós kviknar og þú ert ekki viss um hvað það þýðir skaltu hafa samband áður en þú heldur akstri áfram.

Hvað geri ég ef dekk skemmist eða það springur?

Öryggið kemur ofar öllu. Stöðvaðu bílinn á öruggum stað og hafðu samband við okkur ef þú þarft aðstoð eða ert óviss um hvort óhætt sé að halda áfram.

Kostnaður vegna dekkja- eða felguskemmda fer eftir aðstæðum og þeirri tryggingavernd sem valin var með leigunni. Hjólbarða- og felguvernd (TWP) er meðal þeirrar viðbótarverndar sem Höldur býður upp á.

Hvað geri ég ef ég týni bíllyklinum eða læsi hann inni í bílnum?

Kostnaðaður við nýjan bíllykil getur verið á bilinu 50.000 - 150.000 kr. eftir framleiðanda og er hvert tilfelli skoðað sérstaklega. Greitt er fyrir að fá nýjan lykil sendan til sín eða fyrir að fá starfsmann Hölds til að koma með varalykil til að aflæsa bílnum, ef lykill hefur verið læstur inni. Sá kostnaður ræðst af staðsetningu leigutaka. Hafðu samband við okkur ef þú lendir í slíkum vandræðum og við vinnum saman að bestu lausninni.

Hvað geri ég ef ég lendi í óhappi eða bíllinn skemmist?

Ef bíllinn skemmist eða þú lendir í óhappi skaltu láta okkur vita eins fljótt og hægt er. Ef um slys er að ræða þarf einnig að afla þeirra upplýsinga og gagna sem tengjast atvikinu og skila þeim til Hölds.

Ef slys er alvarlegt skaltu fyrst tryggja öryggi fólks og kalla eftir neyðaraðstoð eftir þörfum.

Má ég aka bílaleigubílnum hvert sem er á Íslandi?

Nei, akstur bílaleigubíla á vegum eða slóðum sem ekki hafa vegnúmer er bannaður. Sama gildir um vegi sem hefur verið lokað vegna aðstæðna. Stranglega bannað er að aka fólksbílum og eindrifsbílum á vegum sem eru F-merktir á opinberum kortum (hálendisvegir) ásamt Kjalvegi (vegur 35) og um Kaldadal (vegur 550).

Hver greiðir stöðugjöld, veggjöld og sektir á leigutímanum?

Leigutaki ber ábyrgð á stöðugjöldum, veggjöldum og sektum sem falla til á leigutímanum.

Ef krafa berst til Hölds eftir að leigu lýkur getur Höldur þurft að greiða kröfuna eða veita viðkomandi aðila upplýsingar um leigutaka. Þá getur einnig bæst við umsýslugjald samkvæmt verðskrá.

Hvað þarf ég að gera áður en ég skila bílnum?

Áður en þú skilar bílnum er gott að fara stuttan hring í kringum hann, taka alla persónulega muni úr bílnum og ganga úr skugga um að eldsneytis- eða hleðslustaða sé í samræmi við skilmála leigunnar.

Ef bíllinn hefur skemmst á leigutímanum skaltu láta starfsfólk Hölds vita við skil.

Hvernig á eldsneytis- eða hleðslustaðan að vera við skil?

Bensín- og dísilbílum er skilað með fullum eldsneytistanki. Ef upp á vantar er eldsneytið innheimt ásamt þjónustuálagi: 25% álag á dæluverð, að hámarki 2.500 kr.

Rafbílar eru afhentir með a.m.k. 75% hleðslu og skal skila þeim þannig. Ef bílnum er skilað með minna en 75% hleðslu er innheimt 100 kr. per kWst.

Þarf ég að þrífa bílinn áður en ég skila honum?

Nei, hefðbundin þrif eru innifalin í legiuverðinu. Hinsvegar getur aukagjald vegna þrifa fallið til þegar þörf er á sérstökum þrifum á ökutæki. Reykingar, þar á meðal notkun rafretta, eru bannaðar í bílum Hölds. Gæludýr eru leyfð án sérstaks aukagjalds, en leigutaki ber ábyrgð á tjóni af þeirra völdum og getur þurft að greiða þrifagjald ef bílnum er ekki skilað hreinum og lausum við dýrahár.

Get ég skilað bílnum utan opnunartíma?

Já, þar sem aðstaða er til þess. Á mörgum afgreiðslustöðum er lykillúga eða skilakassi sem hægt er að nota þegar afgreiðslan er lokuð.

Kynntu þér fyrirfram hvernig skilum utan opnunartíma er háttað á þeim stað þar sem þú ætlar að skila bílnum. Við slík skil er bíllinn áfram á ábyrgð leigutaka þar til starfsmaður Hölds hefur yfirfarið hann.

Hvað gerist ef ég skila bílnum of seint?

Ef þú sérð fram á að geta ekki skilað bílnum á umsömdum tíma skaltu hafa samband við okkur áður en leigutímanum lýkur.

Leigur miðast almennt við sólarhringa frá upphafi leigu. Veitt er 60 mínútna svigrúm eftir lok leigutíma, en eftir það getur hafinn viðbótarsólarhringur talist heill leigudagur.

Mikilvægt er að hafa samband ef leigan þarf að lengjast þar sem tryggingar miðast við þann leigutíma sem skráður er í leigusamningnum.

Hvernig fer skoðun bílsins fram við skil?

Við skil er ástand bílsins borið saman við það ástand sem skráð var þegar leigan hófst. Ef ný skemmd hefur orðið á leigutímanum skaltu láta starfsfólk vita svo hægt sé að skoða hana og skrá.

Ef óhapp varð á leigutímanum þarf einnig að upplýsa um það og skila þeim gögnum sem tengjast atvikinu.

Hvaða tryggingar eru innifaldar, hvað er eigin áhætta og get ég lækkað hana?

Í hefðbundnu leiguverði eru lögbundin ábyrgðartrygging gagnvart þriðja aðila, slysatrygging ökumanns og farþega, CDW-kaskótrygging og þjófnaðartrygging.

Tryggingarnar þýða þó ekki að leigutaki beri enga fjárhagslega ábyrgð ef bíllinn skemmist. Eigin áhætta er sú hámarksfjárhæð sem leigutaki getur þurft að greiða vegna tjóns sem tryggingin nær yfir og er hún mismunandi eftir bílaflokkum.

Hægt er að kaupa viðbótartryggingar sem lækka eigin áhættu og veita víðtækari vernd.

Upplýsingar um tryggingar og sjálfsábyrgðir.

Hvað fellur ekki undir tryggingar?

Tryggingar ná ekki yfir allar tegundir tjóns eða allar aðstæður. Til dæmis bætir engin trygging né valkvætt gjald skemmdir á undirvagni bifreiðar eða skemmdir vegna aksturs í ám eða vötnum né tjón vegna náttúruhamfara. Leigutaki er að fullu ábyrgur fyrir slíku tjóni. Kynntu þér því alltaf hvað tryggingarnar sem fylgja leigunni ná yfir og hvaða takmarkanir gilda áður en lagt er af stað.

Nánari upplýsingar um tryggingar er að finna í leiguskilmálum.

Hvernig er tjón metið og hvað gæti ég þurft að greiða?

Ef bíllinn skemmist fer fjárhagsleg ábyrgð leigutaka meðal annars eftir umfangi tjónsins, eigin áhættu viðkomandi bílaflokks og þeirri viðbótartryggingu sem hefur verið keypt.

Leigutaki greiðir áætlaðan viðgerðarkostnað og önnur gjöld sem kunna að falla til vegna tjónsins. Reynist endanlegur kostnaður lægri en áætlað var er mismunurinn endurgreiddur.